Korrupsiya əməli ABŞ-da açıqlanan Qüdrət Şükürovu Bakıda da yoxlamağa başladılar




Bakı Şəhər İcra Hakimiyyətinin başçısının vəzifələrini icra edən Eldar Əzizovun sərəncamı ilə “Bakılifttəmir” istehsalat birliyində bu strukturun və onun rəhbəri Qüdrət Şükürovun fəaliyyətinin yoxlamaları başlayıb.
Bundan başqa, virtualaz.org-a verilən məlumata görə, Bakı ŞİH-də hüquq-mühafizə orqanlarının nümayəndələrinin iştirakı ilə komissiya yaradılıb və həmin komissiya bu strukturun fəaliyyətini araşdıracaq.
Paytaxt rəhbərliyində bildiriblər ki, komissiyanın işinin yekunlarına görə ölkə ictimaiyyətinə məlumat veriləcək.
ABŞ-ın “United Technologies Corporation” şirkəti ötən gün sentyabrın 12-də bu ölkənin Qiymətli Kağızlar Komitəsinə (SEC) 13.4 milyon dollar cərimə ödəməyə razılaşıb.
Virtualaz.org SEC-in rəsmi saytına istinadən xəbər verir ki, buna səbəb şirkətin törəmə müəssisəsi olan “Otis Elevator Co.” lift istehsalı şirkəti tərəfindən Bakı Lift-Təmir İstehsalat Birliyinə (SEC-in sənədlərində bu müəssisənin adı “Liftremont” kimi gedir) rüşvət verilməsidir.
SEC bildirir ki, “Otis Elevator Co.” Bakının dövlət balansında olan binalarını liftlə təchiz etmək üçün Bakı Lift-Təmir İstehsalat Birliyinin məmurlarını rüşvətlə ələ alıb. Bununla da ABŞ-ın Xarici Korrupsiyaya qarşı Mübarizə Aktını pozub. “United Technologies Corporation” Azərbaycan məmurlarına rüşvət verdiyini nə təsdiq, nə təkzib edir.
SEC şirkətə qarşı təhqiqatı daxili administrativ sərəncam çərçivəsində aparıb və işin məhkəməyə göndərilməməsi üçün “United Technologies Corporation”a cərimə ödəməyi təklif edib. Şirkət təkliflə razılaşıb və 13.9 milyon dolları dövlətə ödəyib.
SEC bildirir ki, 2012-ci ildə Bakı şəhər İcra Hakimiyyəti şəhərin ictimai yaşayış binalarının yeni liftlərlə təchiz edilməsinə dair tender elan edib. “Otis Elevator Co.” bu tenderi udmaq üçün Bakı Lift Təmir İstehsalat Birliyinin rəhbərliyinə rüşvət verməyə razılaşıb. Rüşvətin verilməsi və liftlərin alınması üçün kağız üzərində subpodratçı şirkətlər və vasitəçilər üzərindən qurulmuş sxemdən istifadə olunub.

Facebook'da Paylaş                                                                           Tarix: 2-10-2018, 12:23   Oxunub: 101